Tassalli

Aur phir ek din usne asmaan chura liya.
Taro.n ko beghar kar gai.
Chaand yateem hua dar dar bhatakne laga
Panchhi sabhee zamee.n pe utar aye.
Hawai.n chup chaap baithee roti rahee
Badalo.n ka awarapan chhin gaya
Aate mausam badal gaye
saare jaha ko hila diya
Us bekhabar ne palko.n me sinhare piroye
Aur neela kaaleen ankho pe bicha liya
Aur phir ek din usne aasman chura liya.

Theory of religion

October me hawai.n kuch sard hotee hai.
ek garmahat kisi tyohar ki zehen me hoti hai.
raju ki badi chaachi sweater bana rahee hai.
nangge pao.n hai abdul uskee ammi bata rahe hai.
diwali aj hai, ye sabse keh dunga.
ammi jo eid pe pehna tha, wo fir pehnunga.
diwali k khushiyo.n ne mazhab ki diwar tod di.
pahli fuljhadi k neg se, bochar chhod di.
pehla ghar se nikla rocket sabko nazar ata hai.
bachche to chhup jaate hai
bado.n me umadta bachpan nazar ata ahi .
par doosra rocket humare ghar ka nahee tha.
andaz wai tha par irada wo nahee tha
muhalle ki kuch deewar ab nahee rahee
nazir ki badi beti kahee dikh nahee rahee
kuch maasoom si jane dhua ban gayee.
aman ki saaf hawa mulk se achanak hi kho gai.
chita ki aag se kabro.n pe atishbaazi kara do.
gar wo masjid giri hai toh mandir bhee gira do
ab kaun marega hindu ya musalma.n
pehle hi bata de kidhar tera imaa.n
ghar ki mithaiya.n ghar me hi reh gayee
abbu aye nahee laut k ammi hi reh gayee.
haath me bandook thi rago me baarud lal tha
pichli gali me ek saya bhoklata behal tha
mere ghar me mere apne log fanse hai
wo wahi pe chupe hai unme saans bache hai
unko dhyan se jaakar wahi pe maar dena
mere kamre me jo mithaiya.n hai wo apno me baant dena
fir me dekhta raha jaate kadmo ki ahat ko
chup chaap kah gaya wo diwali mubarak ho.